प्रधानमन्त्री कार्यालयका अनुसार आन्दोलनका क्रममा ५९ जना प्रदर्शनकारी, १० जना कैदीबन्दी र ३ जना सुरक्षाकर्मी गरी कूल ७२ जनाको मृत्यु भएको छ। आन्दोलनमा १३४ जना प्रदर्शनकारी र ५७ जना सुरक्षाकर्मी घाइते भएको विवरण छ। घाइतेहरूको उपचार पूर्ण रूपमा निःशुल्क गरिने सरकारको निर्णय छ।
प्रधानमन्त्री कार्कीले आन्दोलनको क्रममा तोडफोड र आगजनीमा संलग्न व्यक्तिहरूलाई कानूनी दायरामा ल्याइने बताउँदै भन्नुभयो, “रेकर्ड, प्रमाण र सर्वोच्च अदालतका फाइलहरू नष्ट भएर ठूलो क्षति पुगेको छ। भवनहरू त फेरि बनाउन सकिन्छ, तर नष्ट भएका अभिलेखहरू पुनः प्राप्त गर्न सम्भव छैन।”
उहाँका अनुसार देशका अत्यन्त संवेदनशील र आवश्यक सरकारी संरचनाहरूलाई लक्षित गरी हमला गरिएको छ। प्रहरीका चौकी, अदालत, सिंहदरबारलगायतका महत्वपूर्ण स्थानमा आगजनी र तोडफोड भएको र सम्पूर्ण प्रहरी कार्यालयका सवारी साधनहरू समेत क्षतिग्रस्त भएको जानकारी दिइएको छ। सरकारले घटनाको पूर्ण अनुसन्धान गरी दोषीमाथि कडा कारबाही गर्ने प्रतिबद्धता पनि जनाएको छ।
प्रकाशित | २९ भाद्र २०८२, आईतवार १८:५२
